හිජාබ් හි අර්ථය කුමක් ද?

හිජාබ් හි අර්ථය කුමක් ද?

හිජාබ් හි අර්ථය කුමක් ද?

හිජාබ් යන්නෙන් යම් විශේෂිත වර්ණයක් හෝ හැඩයකින් යුක්ත වස්ත්‍රයක් හෝ අර්ථවත් නොවේ. හිජාබ් ඕනෑම වර්ණයකින් තිබිය හැකිය. ඕනෑම හැඩයකින් පිහිටිය හැකිය. හිජාබ් ක්‍රමයෙන් අදහස් වන්නේ මුහුණ, මැණික් කටුව දක්වා වූ දෑත්හ් ඉදිරි කොටස් හා වළලුකරට පහළින් වූ පාද හැර අනෙක් පෙදෙස් ආවරණය වන අයුරින් වස්ත්‍රය පිහිටිය යුතු බවයි.

ඉස්ලාම්හි හිජාබ් අවධාරණය කරන ලද්දේ වැරදි හා පහත් මට්ටමේ චේතනා දරන පුරුෂයින්ගෙන් කාන්තාවන් ආරක්ෂා කිරීමටත් සමාජයේ සදාචාරය සුරකින්නටත්ය. බටහිර රටවල්හි පවතින වස්ත්‍ර නිදහස කෙතරම් අයහපත් ප්‍රතිවිපාක ගෙන දී තිබෙනවා ද යන කාරණාව දැන දැනත් හිජාබ් වස්ත්‍ර ක්‍රමය විවේචනය කිරීම සදාචාරාත්මක නොවේ, යුක්තිසහගත නොවේ.

ඇමෙරිකාවේ නිව්යෝර්ක් ඇතුළු නගර කිහිපයක ම අඩ නිරුවත එනම්, පුරුෂයින් මෙන් උඩු කය නිරාවරණය කිරීම කාන්තාවන්ගේ සම අයිතිවාසිකමක් සේ සලකා නීතිගත කරන මෙන් උද්ඝෝෂණ පැවැත්වීම හිජාබ් හි අවශ්‍යතාව අවධාරණය කරයි.

මුස්ලිම් කාන්තාවන් මුහුණු ආවරණය කළ යුතු ද?

කාන්තාවන්ගේ සම්පූර්ණ සිරුරත් රස විඳිය හැකි අයුරින් තිබිය දී මුහුණ හා අත් පවා ආවරණය කර ගත නොවේ ද? යන පැනය මෙහි දී මතු විය හැකිය. මේ අවයව දෙක ආවරණය නොකර සිටීමට ඉස්ලාම් සහන සලසා ඇත්තේ සාධාරණ හේතු මත ය.

පුරුෂයින් වූවත් කාන්තාවන් වූවත් ඔවුන් අතරින් සර්ව බලධාරී දෙවියන්ට බිය බැතිමත්ව හා විනයානුකූලව ජීවත් වන අය සිටින්නේ ඉතා ස්වල්ප දෙනෙකි. බොහෝ අය විනයානුකූලව හැදියාවෙන් කටයුතු කිරීමට හේතුව ඔවුන් හඳුනන අය අතර තම ගෞරවය කෙලෙසෙනු ඇත යන බියයි. මේ හේතු කොටගෙන ම ඔවුහු විනය රැක ගනිති. ගම තුළ හැදියාවෙන් සිටින අය පිට ගමක දී විනය කඩ කිරීමට හේතුව මෙයයි.

කාන්තාවක් මුහුණත් සම්පූර්ණයෙන් ම ආවරණය කර ගන්නා විට යම් කෙනෙකුට ඇය හඳුනා ගැනීමට අපහසු ය. කිසිවෙකු විසින් තමන් හඳුනාගත නොහැකි වන විට ඇය නොමනා ලෙස හැසිරීම සඳහා එය ලබන්නී ය. ඇය කුමන පුරුෂයෙක් සමඟ හුදෙකලාවේ සිටියත් ඇය කවරෙක්දැයි කිසිවෙක් නොදන්නා නිසා ඔහුගේ භාර්යාව විය හැකියැයි ලෝකය සිතා ගනියි. අන් අය බලා රස විඳින බැවින් මුහුණත් ආවරණය කිරීමට අණ කළේ නම් එය ම වරදට මග පාදයි.

කාන්තාවන් පමණක් නොව පුරුෂයින්ට ද මුහුණු වැස්මක් ඇඳ ගෙන කිසිවෙකු දැනගත නොහැකි අයුරින් ඇඳුම් ඇඳ ගැනීමට අවසර දෙන ලද්දේ නම් ඔහුගේ හැදියාවත් නියම ස්වරූපයත් එවිට හෙළි වනු ඇත. දේව බිය බැතිය නොමැති වූවත් අවම වශයෙන් සමාජය ගැන පවතින භීතියවත් විනය රැක ගැනීමට පෙලඹවිය යුතුය.

තව ද මුහුණ ආවරණය කරන මෙන් අණ කළේ නම් මුස්ලිම් කාන්තාවන් පමණක් නොව මුස්ලිම් නොවන කාන්තාවන් පවා වරදක් කරන විට මුහුණ ආවරණය කරන තත්ත්වයක් උදා වනු ඇත. යම් යම් ප්‍රදේශ වල සිදු වීමත් ප්‍රතික්ෂේප කළ නොහැකිය.

කාන්තාවන් පමණක් නොව වැරදි ක්‍රියා වල නියැලෙන පුරුෂයින් පවා කාන්තාවන් මෙන් මුහුණු ආවරණය කරමින් නොයෙකුත් වැරදි ක්‍රියා කරන තත්ත්වයක් උදා විය හැකිය. කාන්තාවන්ගේ මුහුණ රස විඳින සුළු වූවත් අයහපත් ප්‍රතිවිපාක හට ගැනීමෙන් වැළැක්වීමටත් මුහුණ ආවරණය නොකරන මෙන් ඉස්ලාම් අණ කරයි.

නබි නායක (සල්) තුමාණන්ගේ කාලයේ ජීවත් වූ නබි මිත්‍ර වරියන් කිසිවෙක් තමන් කවුරුන්දැයි හඳුනාගත නොහැකි අයුරින් මුහුණු ආවරණය නොකළ බවට නොයෙකුත් හදීස් දැකිය හැකිය.

ගනුදෙනු කිරීමට, තවත් නොයෙකුත් වැඩ කටයුතු වල නියැලීමට දෑත් අතිශයින් ම වැදගත් ය. ඒවාත් ආවරණය කර ගතහොත් කිසිඳු කාර්යයක කාන්තාවන් නියැලිය නොහැකි තත්ත්වයක් උදා වනු ඇත. වළලු කරට පහළ පාද ආවරණය කරගත යුතුයැයි ද ඉස්ලාම් අවධාරණය කළේ නැත.

මෙය හැර අනෙක් අවයව අනිවාර්යයෙන් ම පුරුෂයින්ගේ හැඟීම් අවුස්සා කැලඹීමට පත් කරන සුළු ඒවා ය. ඔවුන්ගේ පතිව්‍රතතාවට අභියෝග කරන සුළු ඒවා ය. ඒ අවයව විවෘත කර පෙන්වීමෙන් කිසිඳු ඵලක් නැත.

මුංමින් වූ කාන්තාවන්ට කුර්ආනයේ අණ

කාන්තාවන් තම මුහුණ අනිවාර්යයෙන් ම ආවරණය කර ගත යුතුයැයි සමහරු පවසති. නමුත් කාන්තාවන් තම මුහුණ අනිවාර්යයෙන් ම ආවරණය කරගත යුතුබවට පරිශුද්ධ වූ අල් කුර්ආනයේ හෝ නබි වදන් වල හෝ කිසිවක් සඳහන් වී නැත.

පරිශුද්ධ වූ අල් කුර්ආනයේ වැකි දෙකක විශ්වාස කළ කාන්තාවන් වස්ත්‍ර ඇඳගත යුතු ක්‍රමය කුමක්දැයි සර්වඥ අල්ලාහ් පැහැදිලි කරයි. පළමු වැකිය සූරතුල් අහ්සාබ්හි (33වන පරිච්ඡේදයේ 59 වන) වැකියයි. එම වැකියේ මුස්ලිම් කාන්තාවන් ජිල්බාබ් පැළඳගත යුතුයැයි අල්ලාහ් පවසයි. එසේ නම් මුස්ලිම් කාන්තාවන් පැළඳගත යුතු ජිල්බාබ් යනු කුමක්දැයි පැහැදිලිව අපි අවබෝධ කරගත යුතුය. ජිල්බාබ් යනු කුමක්දැයි වටහා ගැනීමට අපගේ චිත්තාභාලාෂයන් පසෙක තබා අල් කුර්ආනය හා නබි නායක (සල්) තුමාණන්ගේ මග පෙන්වීම තුළින් එය වටහා ගැනීම දේව බැතිය වන බව සිහිතබා ගත යුතුය.

ජිල්බාබ් යනු කුමක් ද?

ජිල්බාබ්හි අරමුණ කවරක්දැයි වටහා ගන්නා විට ජිල්බාබ් යනු කුමක්දැයි ඉබේම වැටහෙනු ඇත. එසේ නම් ජිල්බාබ්හි අරමුණ කුමක්දැයි විමසා බලමු. ජිල්බාබ්හි පළමු අරමුණ එය පළඳිනු ලබන තැනැත්තිය කවරෙක් ද යන වග හඳුනා ගනු ලැබීමත් කාන්තාවන් හිංසනයට භාජනය නොවීමත් ය.

يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَى أَنْ يُعْرَفْنَ فَلَا يُؤْذَيْنَ وَكَانَ اللَّهُ غَفُورًا رَحِيمًا )الأحزاب: 59(

නබිවරය, ඔබේ භාර්යාවන්ට ද ඔබේ දූවරුන්ට ද (සෙසු) විශ්වාස කළ ස්ත්‍රීන්ට ද උතුරු සළු හෙළන ලෙස පවසන්න. ඔවුන් හැඳින ගනු ලැබීමටත් හිරිහැර වලට ලක් නොවී සිටීමටත් මෙය යෝග්‍ය ය. අල්ලාහ් ක්ෂමා කරන්නෙක් ද අසම සම දයාවන්තයෙක් ද වේ.

පරිශුද්ධ වූ අල් කුර්ආන් 33:59

ඉහත වැකියේ “උතුරු සළුව” යනුවෙන් අපි පරිවර්තනය කළ තැනෙහි අරාබි මූලයේ ජලාබීබ් යන පදය සඳහන් වේ. මෙය ජිල්බාබ් යන අරාබි වචනයේ බහු වචනයයි.

එනම්, අල්ලාහු රබ්බුල් ආලමීන් නබි නායක (සල්) තුමාණන්ගේ භාර්යාවන්, දූවරුන් හා එක ම දෙවියන් අදහන අනෙකුත් මුස්ලිම් කාන්තාවන් තමන් කෙරෙහි ජිල්බාබ් නමැති සළුව හෙලන මෙන් අණ කරයි.

මෙම වැකියේ සඳහන් විධානය මෙයයි. ජිල්බාබ් නමැති වස්ත්‍රය අංග ලක්ෂණ දෙකකින් සමන්විත වන බව මෙම වැකියේ ප්‍රකාශ වේ.

ජිල්බාබ් ඇඳීම තුළින් කාන්තාවන් හිංසාවට ලක් නොවෙති යන්න පළමු කාරණාවයි.

ඔවුන් හඳුනා ගනු ලැබීම දෙවන කාරණාවයි.

ජිල්බාබ් නමැති උතුරු සළුව පුරුෂයින්ගේ හිංසා වලින් ආරක්ෂාව ලබා දෙන අයුරින් පිහිටිය යුතුය. ඔවුන් හඳුනා ගනු ලැබිය හැකි අයුරින් ද පිහිටිය යුතුය යන්න ඉහත වැකියේ සඳහන් අංග ලක්ෂණ දෙක වේ.

පොදුවේ කාන්තාවන් හිංසනයට ලක් වීමට පළමු හේතුව තම පයෝධර පෙදෙස කැපී පෙනෙන අයුරින් වස්ත්‍ර ඇඳීම ය. ඇඳුම් ඇඳීමෙන් පසු පයෝධර පෙදෙස මත උතුරු සළුවක් දමා ගැනීමෙන් මෙකී තත්ත්වය පහ වී යනු ඇත.

ඒ අතර ම මුහුණ හා පයෝධර මත උතුරු සළුව දමා නොගත යුතුය. එසේ දැමීම තුළින් ඔවුන් හැඳින ගනු ලැබීම අනිවාර්ය ය යන දෙවන කාරණාව නිෂ්ප්‍රභා වනු ඇත.

මෙම වැකිය පිහිටා ඇත්තේ කාන්තාවන්ගේ ඇඳුම් පිහිටා තිබිය යුත්තේ කවරෙක් ද යන වග දැන ගත හැකි අයුරිනි. යම් කෙනෙක් කවරෙක් දැයි දැන ගැනීමට මුහුණ විවෘතව තිබීම අතිශයින් ම වැදගත් ය. මේ අසවලා යැයි දැන ගත හැක්කේ මුහුණ නිරාවරණය කිරීමෙනි.

හැඳිනගනු ලැබීම යන්නෙහි අර්ථය අපි දැනටමත් දැන හැඳින සිටින කාන්තාවක් ජිල්බාබ් පැලඳ එන විට එන කාන්තාව අපි දැනටමත් දැන සිටින කාන්තාවක් වන බවත් අපේ බැල්මට දිස්වන ආගන්තුකයෙක් නම් දෙවන වතාවට දිස්වන විට අපි ප්‍රථමයෙන් දුටු කාන්තාව මැය වන බවත් හැඳින ගත හැකි අයුරින් පිහිටා තිබීම ය.

ජිල්බාබ් යනු මුහුණු ආවරණය කරන අයුරින් වූ වස්ත්‍රයක් නම් අල්ලාහ් මෙම වැකියේ හැඳින ගනු ලැබිය යුතු යැයි අණ කිරීම අර්ථශූන්‍ය වනු ඇත.

සමහරු මෙම වැකිය පරිවර්තනය කිරීමේ දී විනයගරුක කාන්තාවන් යැයි හැඳිනගනු ලැබීමටත් යනුවෙන් ද ගෞරවනීය කාන්තාවන් යැයි හැඳින ගනු ලැබීමටත් යනුවෙන් වරහන් තුළ අමතර විග්‍රහයක් සඳහා යොදා ඇත. විනයවත් හා ගෞරවනීය කාන්තාවන් යැයි හැඳින ගත හැක්කේ මුහුණ ආවරණයෙන් තොර වූවා නම් පමණි. මුහුණු ආවරණය කළ කාන්තාවක් ගෞරවනීය හා විනයවත් කාන්තාවක් යැයි පැහැදිලිව දැනගත නොහැකිය.

මන්දයත් වර්තමානයේ ගණිකා වෘත්තියේ නියැලෙන බොහෝ දුස්සීල කාන්තාවන් නීතියේ රැහැනට කොටු වී අධිකරණයට ඉදිරිපත් කිරීමේ දී සිය මුහුණු ආවරණය කරති. ඔවුන් එසේ කිරීමට හේතුව තමන් කවුරුන්දැයි හඳුනා ගනු ලැබීමෙන් වැළකීමට ය.

කාන්තාවක් මුහුණු ආවරණයක් පළඳිමින් අන්‍ය වූ පුරුෂයින් සමඟ ගමන් කළත් ඔවුන් කවුරුන්දැයි හඳුනාගත නොහැකිය. පුරුෂයෙක් කාන්තාවක් මෙන් ඇඳුම් අඳිමින් මුහුණු ආවරණය කරගෙන මුහුණු ආවරණය කරගත් කාන්තාවන්ගේ සභාවක ඇතුළු වූවත් ඒ පුද්ගලයා පිරිමියෙක් යැයි හඳුනාගත නොහැකිය.

තව ද මංකොල්ලකරුවන් පවා වර්තමානයේ මංකොල්ල කෑමේ දී මුහුණු ආවරණයක් අඳිමින් මංකොල්ලකෑම් සිදු කරති. ඔවුන් මුහුණු ආවරණ පැළඳීමට හේතුව ඔවුන් කවුරුන්දැයි හඳුනාගනු ලැබීමෙන් වැළකීමට ය. එබැවින් මුහුණු ආවරණය කිරීමේ දී යම් කෙනෙක් විනයවත් ද? නැද්ද? යන වග හෝ ගෞරවනීය ද? නැද්ද? යන වග හෝ කිසිවිටෙක දැනගත නොහැකිය.

ඉහත වැකියේ ජිල්බාබ් පැළඳීමේ අරමුණ කවුරුන්දැයි හඳුනගනු ලැබීම වන බව අල්ලාහු රබ්බුල් ආලමීන් පැහැදිලිව පවසයි. එබැවින් ජිල්බාබ් මුහුණු ආවරණය කරන වස්ත්‍රයක් යැයි පැවසීම පරිශුද්ධ වූ අල් කුර්ආනයට පටහැනි මතයක් බව තහවුරු වේ.

ජිල්බාබ් යන අරාබි පදයේ සැබෑ අර්ථය කුමක් ද?

ජිල්බාබ් යන අරාබි පදයට අරාබි ශබ්ද කෝෂයේ විවිධාකාර අර්ථ කථනයන් සඳහන් වේ. නමුත් කිසිඳු තැනක එය මුහුණු ආවරණය කරන වස්ත්‍රයක් යන අර්ථයෙන් සඳහන් වී නැත.

ලිසානුල් අරබ් යන අරාබි ශබ්ද කෝෂයේ මෙම ජිල්බාබ් යන පදයට ප්‍රකාශ වන අර්ථකථනයන් මොනවාදැයි බලමු.

والجِلْبابُ القَمِيصُ

ජිල්බාබ් යනු කමිසයකි.

والجِلْبابُ ثوب أَوسَعُ من الخِمار دون الرِّداءِ تُغَطِّي به المرأَةُ رأْسَها وصَدْرَها

ජිල්බාබ් යනු කිමාර් නම් වූ වස්ත්‍රයට වඩා විශාල වූත් බාහිරව පළඳින සළුවකට වඩා කුඩාවූත් වස්ත්‍රයකි. එමගින් කාන්තාවක් තම හිස හා පයෝධර ආවරණය කර ගන්නීය.

وقيل هو ثوب واسِع دون المِلْحَفةِ تَلْبَسه المرأَةُ

එය පොරෝනයකට වඩා කුඩා වූත් පැතලි වස්ත්‍රයකි. කාන්තාවන් එය අඳිති යනුවෙන් ද අර්ථ කථනය කරනු ලැබේ.

وقيل هو المِلْحفةُ

පොරෝනයක් යනුවෙන් ද මෙයට අර්ථකථනය කරනු ලැබේ.

وقيل هو ما تُغَطِّي به المرأَةُ الثيابَ من فَوقُ كالمِلْحَفةِ

මෙය පොරෝනයක් වැනි කාන්තාවක් ඇඳුම් තුළ මෙන් පොරොව ගනු ලබන වස්ත්‍රයක් යැයි මෙයට අර්ථ කථනයට කරනු ලැබේ.

 

وقيل هو الخِمارُ وفي حديث أُم عطيةَ لِتُلْبِسْها صاحِبَتُها من جِلْبابِها أَي إِزارها

මෙහි අර්ථය කිමාර් යනුවෙන් ද කියනු ලැබේ. උම්මු අතිය්යා (රලි) තුමියගේ හදීසයේ - (කාන්තාවක් ජිල්බාබ් නොමැති නම්) ඇගේ යෙහෙළිය තම ජිල්බාබ් වලින් එකක් ඇයට අඳින්නට සලස්වත්වා! යනුවෙන් සඳහන් වේ. මෙම ජිල්බාබ් යන්නෙහි අර්ථය යට කයට අඳින වස්ත්‍රය යන්නයි.

قال ابن السكيت قالت العامرية الجِلْبابُ الخِمارُ

ජිල්බාබ් යන්නෙහි අර්ථය කිමාර් යැයි ආමිරිය්යා ප්‍රකාශ කළ බව ඉබ්නුස් සික්කීද් පවසා ඇත.

وقيل جِلْبابُ المرأَةِ مُلاءَتُها التي تَشْتَمِلُ بها

කාන්තාවකගේ ජිල්බාබ් යනු හිස් සළුව වේ. ඇය එමගින් ආවරණය කර ගන්නී යැයි මෙයට අර්ථ කථනය කරනු ලැබේ.

ابن الأَعرابي الجِلْبابُ الإِزارُ

ජිල්බාබ් යනු යට කයට අඳින ඇඳුමක් යැයි ඉබ්නුල් අංරාබි පවසයි.

 

وقيل هو كالمِقْنَعةِ تُغَطِّي به المرأَةُ رأْسَها وظهرها وصَدْرَها

මෙය හිස ආවරණය කරන සළුවක් වැනි ය. එමගින් කාන්තාවක් තම හිස ද පිටු පස ද පපු පෙදෙස ද ආවරණය කර ගන්නී යැයි ද මෙයට අර්ථ කථනය කරනු ලැබේ.

අපි ඉහත සඳහන් කළ සියල්ල ලිසානුල් අරබ් නමැති අරාබි ශබ්ද කෝෂයේ පළමු වෙළුමේ පිටු අංක 272හි සඳහන් වේ.

අරාබි ශබ්ද කෝෂය අනුවත් ජිල්බාබ් යනු මුහුණු ආවරණය කරන වස්ත්‍රයක් නොවන බවට අර්ථයක් නොමැති බව ඉතා හොඳින් පැහැදිලි වේ.

නබි නායක (සල්) තුමාණන්ගේ කාලයේ කාන්තාවන් ඇඳ සිටි ජිල්බාබ් වස්ත්‍රය ගැන ද අපි දැනගත යුතුය. ඒ කෙබඳු එකක් ද යන්නත් හිජාබ් පිළිබඳව අපි දැනගත යුතු අනෙකුත් කාරණා ගැන ද අනෙක් කොටසේ බලාපොරොත්තු වන්න. ඉන්ෂා අල්ලාහ්!